下錨，看似容易，但絕對唔係一件簡單既事。好多人以為落錨，就係將個錨「揼落水」咁easy，但其實都有好多學問架。
首先，要知道個海床或河床係乜野底（沙底、泥底，石底），再決定同邊種錨最適合。如果係純碎沙底，因沙好鬆既關係，可能用乜錨都拋唔緊隻船；如是泥底或石底，則好容易拋得緊，個錨好易爪住D泥或者石。出得海多，跟人出去多D，就會基本知道邊度係泥底，邊度係石底，同返度係沙底。
第二要注意既相信係錨鍊既長度，好多人將個錨掟落水，放幾長纜就話之你，求鬼其。結果可能係，錨落左，人又落埋水，點知船越𤅜越遠。所以，正確既錨鍊／錨繩長度應該係水深既四倍左右（即10米水深要落40米錨鍊）。
第三樣應注意既應該係注意船受「風」或「流」既影響，有冇足夠嘅迴旋圈。所以落錨後唔好即刻關engine，應觀察一陣自已隻船會唔會𤅜歪咗，又或撞到其它船或岸邊，又或者隻錨爪唔緊，如有咁既可能就要將門錨起返上黎重新拋過，唔好懶。同埋，作為船長，要時刻觀察住船既位置有冇大變動，提高警覺，而乘客見有乜特別野亦應該同船長講聲。
第四當然要睇下海圖睇邊度可以落錨，邊度唔得。
船錨最好連繫上一段不鏽鋼鍊（約二米），再連接繩䌫，咁就可令個錨更好固定係海床上面，同時亦可防止水底礁石割損繩䌫；如海床係礁石既話，最好係個錨度尾綁一條幼D既「倒尾纜」，萬一個錨鈎石鈎得緊過頭起唔到時，輕輕拉拉條「倒尾纜」就可輕易起翻個錨上黎！
同時，船上面應該備多一個「士啤錨」，萬一主錨起唔到要棄錨時，都有個備用錨。錨係出海時好重要，萬一部船機有問題隻船行唔到時，可以拋個錨落水，固定自已位置再求救。又如如果大風大流，可以在船頭拋一個錨，船尾再拋多個，以穩定船身。
最後，有錨當然要有繩纜配合喇，如果冇纜的話有個錨又有乜用呢？船上應該備有大量嘅士啤䌫，以備不時之需（盧船長，最後呢段係為你而作㗎）。
