·
同渣車相比，渣船既難度相對較高。點解咁講，因為渣車時我地可以清楚看到路面既情況，有障礙物可以輕易避得到；但渣船就唔同，船浮係水上面，靠浸係水中既螺旋槳推進，若有障礙物打到或纏繞着螺旋槳時，輕則解左佢就冇問題，最多用多少少時間，而重則可能造成海難。
有人可能會話：海難？！？！有冇咁嚴重呀？！？！
試諗下，如果有一日大風大浪，隻船又靠住岸邊航行緊，個車葉纏到野，隻船郁唔到時，你地話隻船有冇可能被打到岸邊！？又有冇可能被風浪吹翻！？
膠袋、繩纜、木頭同魚絲係最常見既障礙物。另外一D乾出礁、適掩礁都係好危險既野，大風大浪或者潮漲時跟本睇唔到，所以去D唔熟既海域，真係要睇睇張海圖。
小弟初初玩船時，就係唔知呢D野。有一次部船尾機「索」到膠袋，入水口比個膠袋遮住，alarm響又唔識刪機，搞到機件冇運水降溫，最終隻船要搵船由外島「拖」返黎（成三粒鐘）。翻到黎檢查，師父發現部機 “乸遮”要「打柴」，須要成部機換！呢個慘痛經驗真係「難忘好貴」！
所以，開船時要時刻保持瞭望，眼觀四面，耳聼八方是非常重要的，有任何不尋常時熄機就最穩妥，切記切記！
